Alo kuring asalna mah digawe jadi karyawan diperusahaan, tapi ayeuna mah geus di PHK. Geus genep bulan aya di lembur nganggur. Bararingung cenah, kana tani teu ahli, buburuh punggal-panggul teu kaduga, usaha kana dagang teu boga modal.
"Diajar dagang leuleutikan bae atuh, lo," cekeng teh mere saran.
"Dagang naon atuh, nya Mang?" cenah.
"Ajaran dagang sangray suuk, enteng garapanana oge."
Tayohna ku Si Alo kahartieun saran ti kuring teh, da katempo terus badami jeung bojona. Ari anakna mah tiluanana oge mani aratoh, ngadenge bapana rek dagang sangray suuk teh, maklum barudak keur meujeuhna resep kana kadaharan jajanan.
Sanged bae Si Alo teh nyiapkeun parabot, keur kaperluan nyangray suuk, katut keur tanggungan keur dagangna.
Poe isukna, isuk keneh Si Alo geus indit dagang, ngajugjug pasar. Nanggung dagangan teu jadi masalah, da puguh barang hampang.
Dagangna di sisi jalan deukeut lawang pasar, jajalaneun anu kawilang rame, jalma anu rek asup ka pasar, oge kaluar ti pasar, nya kitu deui barudak anu rek ka sakola loba anu ngaliwat kadinya. Maklum dagang kakara, nawarkeun oge masih kaku, tapi ari mungkusan mah geus tapis. Geus sajongjonan canukul, kana dagangan mah can aya nu meuli. Suuk meunang mungkusan geus numpuk, bari tambah kesel sangray suuk nu can dibungkus, dikorehan dipilihan any kurang beuneurna, tiap manggih nu kurang beuneur, langsung dipesek terus di huapkeun.
Keur kitu jol Ma Karsih, tukang dagang ngasong, masih batur salembur keneh.
"Aeh, Si Ujang dagang sangray suuk, Ujang tah sasarap, rek surabi rek leupeut jeung gorengan?" ceuk Ma Karsih nawaran.
"Teu acan kekengingan artos Ma," walon Si Alo.
"Geus biasa ujang jeung tukang dagang deui mah, silih tukeuran," ceuk Ma Karsih.
Sanggeus dahar surabi jeung leupeut katut gorengan, kurunyung Mang Engkus tukang bubur kacang, terus silih tukeuran suuk jeung bubur kacang.
Nya kitu deui waktu paamprok jeung Mang Gaos tukang bandros, sarua teu kuartos, barang dagangan bae pagentos-gentos.
Waktu maju kabeurang Si Alo ngarasa lapar, da enya tadi isuk teu kungsi dahar. Ngadeukeutan tukang kupat tahu, pok cacarita, duanana satuju kupat tahu ditukeuran ku sangray suuk. Kalalar aya tukang balon, ras inget poe kamari anak anu pangleutikna ngelak ceurik haying balon ngok-ngek, kabitaeun ku budak tatangga. Ngaharewos ka tukang balon, cenah. Tukeuran bae ku sangray suuk.
Kaayaan pasar geus corengcang, nu ngaliwat geus rentang-rentang, Si Alo ge siap mulang. Ceg kana tanggungan, karasa jadi ngoleang hampang. Sesa sangray suuk anu dina jero blek ngan kari saeutik deui. Datang ka buruan, si bungsu ajrag-ajragan, atoheun bapa datang mawa cocooan nu dipikahayang. Lanceuk-lanceukna kakaratak kana tanggungan, dina jero blek aya keneh sangray suuk, langsung bae didalahar. Pamajikan Si Alo tumanya soal hasil dagangan, Si Alo ngabigeu, pamajikanana langsung bangkenu.
Tidak ada komentar:
Posting Komentar