Pasosore, bada asar, bulan Pebruari katompernakeun, kuring nganteur pamajikan ka dokter kandungan. Ceuk rarasaan mah asa gasik indit ti imah teh. Samemeh asup waktu sholat ashar, kuring jeung pamajikan geus tatan-tatan. Kartu pasien geus disiapkeun, motor geus dihirupan (dipanaskeun), malah pakean oge geus saged. Nu matak barang ngong nu adan ngabejaan geus wancina solat asar, kuring jeung pamajikan terus bae berjamaah sholat.
Barang tepi kaburuan tempat praktek dokter, kuring rada ngejenghok sabab pasien geus ngagimbung. Salian ti motor malah aya mobil L-300 bak terbuka sagala. Atuh buru-buru pamajikan sina daftar ngarah nomerna henteu gede teuing. Ari praktekna mah acan dimimitian, biasa dokterna telat. Sanggeus daftar sarta meunang nomer pamajikan mah nungguan di jero di rohang tunggu, ari kuring mah ngadon ngawangkong jeung anu sejen anu sarua nganteur pamajikanana, diluar bae bari nungguan motor.
Teu pati lila kadenge suster geus nyebutan pasen saluyu jeung nomer karcisna, tanda praktek geus dimimitian. Meunang tilu pasen kitu lamun teu salah mah. Anu kaopatna suster nyebut Ibu Walpan, cenah. Anu matak kuring jeung anu sejen rada kaget lain pedah eta ngarana siga ngaran lalaki, tapi eta awewe lalaki setengah tawuhan anu ti tatadi caricing dina L-300 bak terbuka tea, teu sirikna luncat ka jero. "Tah giliran Bapa," cenah kitu ngomongna teh.
Ngan teu kungsi lila, anu tadi arasup aya kana genep urangna teh, geus kaluar deui bari ngarereyang hiji lalaki anu geus boga umur malah geus deukeut ka aki-aki sigana mah. Maranehna maruru deui kana mobil tea. Diantara maranehna kaciri siga anu silih salahkeun.
Panasaran kuring nanya ka salah saurang diantara maranehna.
"Ku naon teu cios, Bu?"
"Lepat dokter, Jang."
"Ari kitu saha anu bade dipariosna?"
"Itu pun bapa, kedahna mah saur suster teh ka dokter spesialis dalam."
Kuring jeung anu sejen ukur seuri mesem. Deudeuh teuing ti kampung meureun maranehna teh. Nyaah ka kolot tapi kurang asak tatanya. Jadi waeh... aki-aki dibawa ka dokter kandungan.
Tidak ada komentar:
Posting Komentar